Such A Parcel Of Rogues In A Nation

By Robert Burns


Fareweel to a' our Scottish fame,
Fareweel our ancient glory;
Fareweel even to the Scottish name,
Sae famed in martial story.
Now Sark rins over Solway sands,
And Tweed rins to the ocean,
To mark where England's province stands -
Such a parcel of rogues in a nation!

What force and guile could not subdue,
Thro' many warlike ages,
Is wrought now by a coward few,
For hireling traitor's wages.
The English stell we could disdain,
Secure in valour's station;
But English gold has been our bane -
Such a parcel of rogues in a nation!

O would, or I had seen the day,
That treason thus could sell us,
My auld grey head had lien in clay,
Wi' Bruce and loyal Wallace!
But pith and power, till my last hour,
I'll mak this declaration;
We're bought and sold for English gold
Such a parcel of rogues in a nation!